أنطوى ليل الاساء ما حن له غصن الحنين=وانبلج نور الوله وأرخى على متن السحاب
كانت القصه غرام تدور مع دور السنين=كانت بدايات الطفوله واثرها صرخه عذاب
ماخطر ف البال كلْ السالفة يمكن تبين=يمكن تمر مع السوالف مايجي فيها ارتياب
سالفة عمري تطول وطاولتني .. بالونين=كل ونّه تسأل وتحتار ما تلقى الجواب
اذكر الطفل الصغير اللي تحرى القادمين=من فرحته ما كنْ رجله تستوي فوق التراب
قالوا الليله .. يجون وكلنا .. متآكدين=سافروا من قبل شمس الارض تهرف للغياب
هذا وعدهم حروته وصلت وحنا ميقنين=شرّعوا بيت الشعر بقدوم .. هاذيك الركاب
طفلكم لجّت ضلوعه وانتم .. انتم غافلين=استفاق وفرحته كانت متاعه .. والزهاب
قام يتحراهم وكنّه داخل أحلامه سجين=عينه على الريْع المقابل ما يغطيها الضباب
ويوم اقبلوا ضحكات عينه واصله حد الجبين=قام وتعرضهم وحيّاهم ونادى .. واستذاب
صبح عيد الفطر غير وعاد عيد المسلمين=ياخذ ايديها ويسرح من هضاب أليا هضاب
يلعبون من البراءه ما دروا ب العاشقين=واثرها كانت عناوين الهوى وسط الكتاب
نكبر ويكبر عشقنا مير الملاقى .. ما يبين=كود نظرة من بعيد وكنّها .. لمحه سراب
سامح الله ساعةٍ فيها نشوف الراحلين=وسامح الله فرحتن ماهي متاعي والزهاب
أحرم عيوني ولدْ الوصل من بين الثنين=ماترك للوصل درب ولا ترك للوصل باب
طفلٍ صغير بداخله قلبٍ من الذكرى حزين=مال البراءه ف الطفوله غير تعذيب الشباب
|
